أشهر 12 سؤال في مقابلة العمل

Facebook
LinkedIn
Twitter
Google+
http://blog.wuzzuf.net/%D8%A3%D8%B4%D9%87%D8%B1-12-%D8%B3%D8%A4%D8%A7%D9%84-%D9%81%D9%8A-%D9%85%D9%82%D8%A7%D8%A8%D9%84%D8%A9-%D8%A7%D9%84%D8%B9%D9%85%D9%84/">
Pinterest
SHARE

مقابلة العمل ممكن تبقى موقف بيسبب التوتر، وأفضل طريقة تخفف من التوتر ده انك تحضّر للمقابلة كويس.ممكن تعمل بحث على الانترنت عن أشهر الأسئلة اللي ممكن تتسألها في أي مقابلة، ممكن كمان تدوّر على الأسئلة الخاصة بالوظيفة اللي انت رايح مقابلة العمل عشانها والأسئلة دي بتبقى متخصصة أكتر في تفاصيل المهارات اللي بتحتاجها الوظيفة، وطبعا لازم تعرف معلومات عن الشركة أو المؤسسة اللي عايز تشتغل فيها.

جمّعنا أشهر الأسئلة اللي ممكن تتسألها في مقابلة العمل:

1- قدم نفسك/ اتكلم عن نفسك.

السؤال ده بيتسأل في كل المقابلات تقريبا عشان كده لازم تبقى مجهز إجابة ليه، بس خد بالك عشان ميبقاش شكلك متدرب على الإجابة قبل كده خصوصا انه سؤال بسيط…اتكلم عن دراستك والوظايف اللي اشتغلت فيها قبل كده، وخبراتك في نفس مجال الوظيفة اللي انت مقدملها.  اتكلم من الأقدم للأحدث، وخلي إجابتك في حدود دقيقة أو دقيقتين كحد أقصى.

2- ليه عايز تشتغل؟ وليه سبت آخر شغل؟

المفروض انك عايز تشتغل أو تغير شغلك عشان تحقق تقدم في حياتك العملية، وتشتغل في وظيفة تعلمك حاجات جديدة وتطور في شخصيتك، عشان كده بلاش تجيب سيرة الفلوس في السؤال ده، لان كده هيبقى شكلك مادي أوي، ولو كنت سبت شغلك اللي فات بسبب افلاس الشركة أو لتقليل عدد الموظفين، خليك متفائل ومتبيّنش انك متضايق واتكلم عن الموضوع باختصار على قد ما تقدر.

3- تعرف إيه عن الشركة دي؟

وهنا يجي دور البحث عن تاريخ الشركة ودورها والخدمات اللي بتقدمها. لازم تبقى محضر نفسك للسؤال ده ومجهز إجابته من غير ما يبان انك حافظ وبتسمّع.

4- ليه عايز تشتغل في الشركة دي بالتحديد؟

ممكن في السؤال ده تتكلم من خلال المعلومات اللي جمعتها عن الشركة واللي من خلالها قررت انك عايز تشتغل في المكان ده. قبل ما تروح المقابلة جهز إجابة للسؤال ده، وزود عليها خططك و أهدافك الشخصية اللي انت محددها لحياتك العملية، وازاي شغلك في الشركة دي هيحققهم. حاول تتكلم عن حاجة معينة بتميز الشركة دي، مثلا زي التدريب أو عدد العملاء الكبير أو مكانة الشركة في سوق العمل.

5- قدمت على وظايف فين تاني؟ قدمت في شركات تانية؟

ممكن تجاوب بصدق في السؤال ده، بس مش لازم تقول انك قدمت في 60 شركة غيرهم  عشان كده هيبقى شكلك مش عارف عايز ايه وبتقدم وخلاص، كفاية أوى أنك تقول اسم شركتين أو ثلاثة، ومن غير تفاصيل، الهدف من السؤال انه يبان انت بتدوّر على شغل فعلا وعارف انت عايز ايه ولا لأ.

6- اوصف موقف اشتغلت فيه تحت الضغط، واتعاملت معاه ازاي؟

في اجابات كتير ممكن تجاوب بيهم على السؤال ده: ممكن مثلا تقول انك بتشتغل كويس تحت الضغط. ممكن كمان تقول انك بتوصل لأفضل أداء ليك تحت الضغط. ممكن تقول انك فعلا بتفضل تشتغل تحت الضغط. لو مش عايز تنجح وتعدي في المقابلة في الحالة دي بس ممكن تقول انك مبتشتغلش بكفاءة تحت الضغط!

7- هل بتشتغل بكفاءة ضمن فريق عمل؟

مفيش اجابة للسؤال ده غير نعم! دي الاجابة الوحيدة… اكيد عشان تبقى موظف كفء لازم تكون بتشتغل بكفاءة ضمن فريق عمل، ويا ريت تدي مثال على كلامك من مواقف اشتغلت فيها في فريق… ممكن كمان تتكلم عن مهاراتك كقائد لو عندك المهارات دي فعلا.

8- ايه هي نقاط القوة في شخصيتك؟

أي إجابة عن مميزات في شخصيتك أو مهارات عندك تعتبر إجابة مقبولة، مثلا ممكن تتكلم عن: قدرتك على ترتيب الأولويات، وحل المشاكل، وقدرتك على الشغل تحت ضغط، أو خبرتك في مجال معين، ومهاراتك كقائد، ونظرتك الايجابية للأمور،أو أي مميزات تانية شايفها في نفسك بس خد بالك متحاولش تظهر على انك ملاك لانه كده محدش هيصدقك.

9- إيه هي نقاط ضعفك؟

الإجابة التقليدية للسؤال ده انك تقول ميزة وتقلبها لعيب. فمثلا تقول انك بتهتم بالتفاصيل أوي وده شيء مرهق وبياخد وقت أو انك بتشتغل كتير أوي وبتضغط على نفسك جامد! الاسلوب ده في الإجابة اتعمل قبل كده كتير، وحتى لو كنت بتتكلم بجد، غالبا اللي بيسألك مش هيصدقك. اكيد عارف الحيلة دي كويس!

لكن فيه طريقة أفضل، ممكن تتكلم عن نقطة ضعف حقيقية فيك وانت اشتغلت عليها وعرفت تصلّحها وتوصف عملت إيه عشان تصلحها، مثلا ممكن حد يقول “أنا كنت شخص مش اجتماعي وبتجنب مواقف اتعامل فيها مع الناس، لكن لما اشتغلت في عمل تطوعي بقيت بتعامل مع ناس كتير ومع الوقت بقيت اقدر اتعامل مع أي حد بسهولة”.

طبعا ده مجرد مثال.  فكر في نقطة ضعف فيك اتحسنت وفكر حسنتها ازاي، لأنك في كل الأحوال مينفعش تجاوب على السؤال ده بإنك تقول إن معندكش نقاط ضعف، لان كده هتظهر كشخص متكبر ومش صادق مع نفسه.

10- مخطط تبقى ايه بعد 5 سنين؟

بلاش الإجابات العامة في السؤال ده، المفروض يبقى عندك أهداف طويلة المدى وتبقى عارف انت عايز توصل لإيه، حاول على قد ما تقدر تبقى محدد في إجابتك … ممكن تبحث في التدرج الوظيفي للوظايف في نفس المجال والمستوى اللي انت عايز توصل ليه في المستقبل من خلال وظيفتك أو أي حاجة تانية ممكن توصلك لهدفك زي الدراسة مثلا.

11- بالنسبة للمرتب، ايه المبلغ اللي تتوقعه؟

متجاوبش السؤال ده على طول ببساطة كده، حتى لو عندك فكرة عن مستوى مرتبات الوظيفة دي…طبيعي تكون عايز أعلى مرتب ممكن توصلّه في الوظيفة دي، والشركة كمان طبيعي تبقى عايزة تشغلك بأقل مرتب تقبل بيه… ممكن قبل المقابلة تسأل عن مستوى المرتبات في الوظيفة دي، وترد على السؤال وتقول انك من خلال معلوماتك عارف أن مستوى المرتبات للناس اللي عندهم نفس سنين خبرتك بيتراوح ما بين….و…..

12- عندك أي أسئلة؟

سؤال غالبا لازم يتسأل في نهاية كل مقابلة عمل، خليك دايما محضر اسئلة لانك لو قلت انك معندكش اسئلة هيبان انك مش مهتم بالوظيفة أو انك ما صدقت ان المقابلة تخلص… ممكن تسأل مثلا “في حالة اني نجحت في المقابلة، المفروض أبدأ شغل امتى؟”، ممكن كمان تسأل انت “لو اتقبلت في الوظيفة هشتغل في ايه بالضبط؟”.

أكيد في أسئلة تانية غير الـ12 سؤال دول، أهم حاجة انك تبقى فاهم إن إستراتيجية الإجابة هي انك توضح انك انسب شخص للوظيفة من خلال إجاباتك اللي بتبيّن مهاراتك المناسبة للوظيفة دي.


Facebook
LinkedIn
Twitter
Google+
http://blog.wuzzuf.net/%D8%A3%D8%B4%D9%87%D8%B1-12-%D8%B3%D8%A4%D8%A7%D9%84-%D9%81%D9%8A-%D9%85%D9%82%D8%A7%D8%A8%D9%84%D8%A9-%D8%A7%D9%84%D8%B9%D9%85%D9%84/">
Pinterest
SHARE


3 Responses

  • sara atef on January 28, 2015, 13:16:50

    Thanks alot for this great information .

    Reply to sara
    • Esraa Mamdouh on February 19, 2015, 08:48:22

      I am glad you found it useful Sarah :)

      Reply to Esraa
    • Esraa Mamdouh on February 19, 2015, 08:48:52

      I am glad you found it useful Sara :)

      Reply to Esraa

Menu