ازاي تنجز شغلك في الوقت المطلوب؟

Facebook
LinkedIn
Twitter
Google+
http://blog.wuzzuf.net/%D8%A7%D8%B2%D8%A7%D9%8A-%D8%AA%D9%86%D8%AC%D8%B2-%D8%B4%D8%BA%D9%84%D9%83-%D9%81%D9%8A-%D8%A7%D9%84%D9%88%D9%82%D8%AA-%D8%A7%D9%84%D9%85%D8%B7%D9%84%D9%88%D8%A8%D8%9F/">
Pinterest
SHARE


كتير منا أحيانا بيحسوا ان الشغل اللي المفروض يخلصوه أكتر من وقتهم وقدراتهم…لكن في شوية نصايح ممكن تساعدك انك تركز وتنجز شغلك أسرع:اعمل قوائم (To-do Lists):

القائمة أو (to-do list) هتساعدك انك ترتب شغلك حسب الأولوية وكمان عشان متنساش حاجة…لما هتخلص جزء من شغلك وتشيله من القائمة هتحس بالانجاز وهتتشجع انك تخلص أكبر قدر ممكن من شغلك.

المشكلة هي ان ممكن الشغل يبقى كتير والقائمة تبقى محبطة…ممكن تعمل قائمتين: واحدة يبقى فيها المهام اللي ليها الأولوية ووقتها محدود، والقائمة التانية يبقى فيها المهام اللي ليها أولوية أقل وليها مساحة وقت أكبر.

ولو اشتغلت على مهمة وتفكيرك وقف ومش قادر تكملها …اشتغل على اللي بعدها عشان الوقت ما يضيعيش ….ممكن لما تسيبها شوية وترجعلها تجيلك فكرة جديدة تخليك تكملها.

حدد مواعيد معقولة لانتهاء كل مهمة:

حدد بشكل تقديري معاد لانجاز كل مهمة….ممكن تتحدى نفسك وتخصص وقت قليل لمهمة معينة …بس خليك واقعي في نفس الوقت عشان ما تحسش بالاحباط لو اتأخرت عن المعاد ده.

اشتغل في مهمة واحدة بتركيز:

الشغل على مهام كتير في نفس الوقت عيب أكتر منه ميزة…الأفضل انك تشتغل على مهمة واحدة بس بتركيز وده هيخليك تخلصها أسرع وبجودة أفضل.

افتح الايميل 3 مرات خلال اليوم:

وقت كتير جدا بيضيع بسبب انك كل 10 دقايق تفتح الإيميل…ممكن تفتح الايميل مرة الصبح ومرة في نص اليوم ومرة في آخر اليوم…وفي كل الأحوال لو جالك ايميل مهم هيظهر لك تنبيه.

استخدم الانترنت في الشغل بس:

الانترنت خلى الشغل أسهل…لكن في نفس الوقت ممكن يضيّع وقت كتير جدا….حاول تفتح عدد قليل من النوافذ عشان تقلل التشتيت …ويفضل انك ما تفتحش مواقع التواصل الاجتماعي – غير في وقت الاستراحة – لأنها بتضيع الوقت اللي ممكن تستخدمه بشكل أفضل في انك تخلص شغلك..

اسمع موسيقى:

ممكن تستخدم سماعات الكمبيوتر وتسمع الموسيقى اللي بتحبها وانت بتشتغل … كده هتشتغل بمزاج وكمان هتركز في شغلك بعيدا عن أي كلام جانبي بين زمايلك…بس خد بالك ان مستوى الصوت يبقى مناسب عشان الصوت العالي مضر جدا للأذن.

اتحرك:

الرياضة مهمة جدا لأنها بتخليك نشيط وده أكيد مفيد لشغلك…وفي الشغل بلاش تفضل قاعد على المكتب طول اليوم… حاول على قد ما تقدر تقوم من المكتب وتتمشى حتى لو لفترة بسيطة لأن ده هيجدد نشاطك.

خد استراحة:

الاستراحة مهمة جدا لانك لو ماخدتهاش هتزهق من الشغل ومش هتخلصه لأن تركيزك هيقل….استغل الاستراحة واتغدى مع زمايلك وغيّر من جو الشغل شوية.

كافىء نفسك:

لو انجزت شغلك بالشكل المطلوب كافىء نفسك لان ده هيشجعك انك تحافظ على نفس الأداء في الشغل.

امشي من الشغل في معادك:

ساعات بنضطر اننا نكمل شغل بعد مواعيد العمل الرسمية…بس ده الاستثناء، ومينفعش يبقى القاعدة…لما تروّح في معادك هيبقى معاك وقت بعد الشغل تخرج أو تعمل أي حاجة تانية بتحبها، وده هيجدد نشاطك ويمنع الملل وهيساعدك انك تشتغل أحسن في اليوم اللي بعده.

اهتم بصحتك :

الأكل الصحي هيفرق بشكل كبير في قدرتك على التركيز…اشرب ميّة على قد ما تقدر…ويفضل انك تفطر قبل ما تنزل الشغل……كمان النوم مهم جدا للتركيز في الشغل واحساسك بالنشاط بقية اليوم بعد الشغل…6 أو 7 ساعات نوم كل يوم مش ترف…بالعكس ده اللي هيخليك قادر تشتغل أسرع.

لو ركزت ومضيعتش وقتك و عملت كل الحاجات دي والوقت فعلا مكنش كافي انك تخلص شغلك ممكن ببساطة ترجع لمديرك وتطلب وقت أكتر.


Facebook
LinkedIn
Twitter
Google+
http://blog.wuzzuf.net/%D8%A7%D8%B2%D8%A7%D9%8A-%D8%AA%D9%86%D8%AC%D8%B2-%D8%B4%D8%BA%D9%84%D9%83-%D9%81%D9%8A-%D8%A7%D9%84%D9%88%D9%82%D8%AA-%D8%A7%D9%84%D9%85%D8%B7%D9%84%D9%88%D8%A8%D8%9F/">
Pinterest
SHARE


Menu