الموظفين عاملين زي لعيبة الكورة

Facebook
LinkedIn
Twitter
Google+
http://blog.wuzzuf.net/%D8%A7%D9%84%D9%85%D9%88%D8%B8%D9%81%D9%8A%D9%86-%D8%B9%D8%A7%D9%85%D9%84%D9%8A%D9%86-%D8%B2%D9%8A-%D9%84%D8%B9%D9%8A%D8%A8%D8%A9-%D8%A7%D9%84%D9%83%D9%88%D8%B1%D8%A9/">
Pinterest
SHARE

الجزء التاني في الكورة اسلوب حياة: اللاعيبة ما هم إلا نموذج مكبر من الموظفين
لو عايز تقرا الجزء الأول: المديرين عاملين زي مدربين الكورة

الموظف المتدين (تريكة ستايل)
راجل Straight شاطر جداً في شغله وبيراعي ربنا في كل جنيه بيقبضه.. هو الموظف اللي تلاقية داخل عليك الصبح بظرف عشان يلم فلوس لحالات إنسانية تكون في ميزان حسناتك.. ييجي الفرض يحاول يلم أكبر عدد الأشخاص عشان يصلوا جماعة..
مريح جداً لمديره عارف اللي ليه و اللي عليه و مبيخافش حتى لو من صاحب الشركة عشان عندة مبدأ.. الكل بيحب يصاحبه عشان خبرته و أسلوبه في القيادة والشغل.
خجول جداً لازم تنكشه عشان تطلع منة حاجات حلوة كتير.. ما بيتوترش أبداً، ودايماً بيكون واحد من أحسن الناس اللي تمثل الشركة في الـ Events اللي في مصر وبرة مصر.
بيحترم العملاء جداً جداً جداً.

الموظف المتغرب (صلاح ستايل)
بيحاول يمشي أموره مع كل اللي حواليه و كلهم من جنسيات مختلفة عشان أكل العيش.. مهما الإدارة تيجي عليه في كتير من الأوقات بيقعد ساكت عشان لقمة العيش اللي متغرب عشانها، وعشان شايف زمايله اللي في بلده طالع عينيهم و نفسهم يهجّوا.
الغربة بتقربه من ربنا كتير.، هتلاقية ماشي جنب الحيط و بيقول كلمة حلوة وبس.. غير كدة هو ميحطش نفسة في مشاكل.
مجتهد جداً و دؤوب ومش بيكل، نموذج للصبر وهمه إنه يكون سوبر وبرضه إنه يستمر في مكانه أو يروح مكان أحسن برضه في الغربة.
هدفه و طموحه بيكون شايله لنفسه و مش بيتكلم عنه كتير.
دايماً مبتسم وبيكسب كتير من ابتسامته.

الموظف المؤمن بنظرية الإضطهاد (بالوتيللي ستايل)
هو المدير لية مش بيحبني ؟
هما بيغلسوا عليا لية ؟
هما أكيد عايزين يمشوني !
اشمعني فلان يترقي و انا لأ ؟
جمل دايماً تسمعها منة مع إنة لو ركز في شغلة و بعد عن السلبية المتمثلة في نظرية الإضطهاد هيطلع قماش معتبر
و غالباً حياتة الشخصية الخربانة بتكون واحدة من الأسباب اللي مخلياة كدة…عاملة بحذر لأنة حساس و اديلة ثقتة في نفسة لو سمحت….عشان هو شاطر في الأساس.

الموظف الطموح (رونالدو ستايل)
واخدها من تحت و دخل الشركة من غير واسطة لقى نفسه مش موهوب بالدرجة الكافية بس قماشة كويسة فيخلص الشغل ويروّح يذاكر عشان ييجي بكرة أحسن وعنده knowledge أكتر ..
دايماً حاطط نفسه في مقارنة مع أشطر واحد في الإدارة عشان يتميز، و لما ساعات يعمل achievements أكتر من الموظف إياه مش بيكتفي و يقول خلاص لأ بيدخل في تحدى و عند مع نفسه ساعات كتير.
عايز بدل الـ thanks mail عشرة فبيشتغل..
عايز بدل درع التفوق لأحسن موظف في الشركة عشرة فبيشتغل..
هو موظف عشرة على عشرة و الشركة بترقيه بسرعة البرق لأ و كمان عندة Private business على جنب و مش مأثر عالCore business

الموظف البارد (نوير ستايل)
لو قلتله”الحق المدير قالب الدنيا و بيدور عليك” عاااااادي جداً تلاقيه بيقولك هخلص القهوة و ادخل له.
“الحق السيستم وقع و الIT بيقولك مش قبل ساعتين عشان نكون live تاني” تلاقيه يقولك بكل برود نشتغل Manual
ثباته الانفعالي عالي جداً و صعب تسخنه أو تستفزه .. دمة تقيل و مش بيضحك، والـPerformance بتاعة ثابت بشكل كبير و هو اللي بيتولى تهدئة المواقف المشتعلة في الإدارة.. غالباً الإدارة العليا بتكون بتعده بشكل كبير عشان يبقى جزء من مستقبل الإدارة

الموظف اللي معندوش عواطف (لويس فيجو ستايل)
اللي عندة استعداد يروح يشتغل مع منافس شركتهم من بكرة عشان جنية زيادة….و دايماً يهدد مديرة إنة ممكن يفجر القنبلة في أى وقت….
هو عملي جداً و شاطر و مش جاي يحب و يعيش عواطف في الشركة و حاسس بنفسة جداً
استغلة علي قد ما تقدر مادام بياخد مرتب معتبر و دة متديلوش الأمان و تعامل معاة بحساب…
معندوش مانع يكون مكروة بس يكون ناجح و لو احتك بشركتة القديمة في ميتج او مناقصة او هبقى قاسي عليها

الموظف العصبي (جينارو جاتوزو ستايل)
بيحب إدارته وشركته جداً بدرجة مجنونة ساعات يتهيأله انها شركة أو إدارة أهله من كتر ما بيحبها وبيغير عليها.. ممكن يتخانق مع أي حد في الإدارة لو لقاة مقصر في شغله حتى لو ملوش أي سلطة عليه.. لكن متسبوش يسوق فيها عشان ممكن بعصبيته يبوظلك الدنيا و استخدمه في إنك تحمس بيه الإدارة.. غالباً هو مش بيكون سوبر أوي في شغله عشان العصبية شوية بتأثر عالـPerformance بتاعه، بس خليه صخرة تتسند عليها لو مزنوق. يوم ما هيمشي من الشركة هيفضل يدافع عنها بروحه.

الموظف أبو دم خفيف (محمد بركات ستايل)
دايما يدخل الكوميديا و الفكاهة في الشغل و مش بيعرف يشتغل و يفنن غير لما تبقي الدنيا مفرفشة و ظريفة و لو ضغطته أكتر من اللازم مش هتعرف تطلع منه القماش اللي أنت عايزه ولو اديته فرصته إنه يضحك و ينكت هتاخد منة زهرة الزهر .. أرجوك سيبه علي هواة مادام مش بيتعارض أو بيأثر على الـFlow بتاع الشغل..
الموظف دة من أول حارس الأمن وأنت طالع..  محبوب و بيمشيها بالحب يعني بتمشي! وبتمشي حلو أوي

الموظف العصفورة (أربيلوا ستايل)
هو قاعد في الشركة بيعمل ايه؟ متعرفش
مش شايف ليه أي مساهمة في الأداء الجماعي و لا حتى الفردي … قديم في المكان بيصاحب المديرين بس.
بيحاول يـMentor عليك في أي حاجة عشان يكون ليه Touch
و دة محدش بيعرف يمشيه عشان هو عصفورة تمام 

الموظف الرومانسي (جون تيري ستايل)
هو جاي يعيش دور روميو
معندوش أي مانع إنه يعيش الدور ويلاطف في الشركة ولو هربت منه ربنا يستر.. ممكن يبص لخطيبة زميله أو حتى مراته فممكن يخربلك الدنيا.. اوعي تعينه عندك في الإدارة بس لو أنت بتحب الطريقة دي خده معاك
معمر في المكان مش بتاع تنطيط و مستوى شغله متوسط، شغال يعني.. و هو اللي تخلية يخلصلك أي مصلحة شغل مع أي بنت وبيبدع في الـProjects اللي فيها بنات

الموظف المجهول ( ماتويدي ستايل)
هو ظاهرياً مش بيعمل أي انجاز مؤثر و غالباً بيكون مش ذكي بس بيشتغل كتير و زمايله بيحدفو عليه الشغل بطريقة مباشرة و غير مباشرة و هو بيعملة زي القطر..
مش بيعرف يلمع نفسة، طيب جداً و هتحس بقيمته لما يمشي بس أنت لو مدير شاطر هتعرف تستغلة أحسن استغلال و هيكون جوكر ليك.
طلباته قليلة ومش بتاع مشاكل ومن الشغل للبيت و العكس ملوش في الOutings و الSocializing و ناس كتير مش عارفاة في الشركة.

الموظف الممثل ( بوسكيتس ستايل)
بيعرف يشتغل مديره و زمايله و العملاء كويس جداً.
علي طول يوهم الناس إنة عايش في معاناة و مضغوط من الشغل و هو في الواقع عادي لا مطحون ولا حاجة بس أداءه التمثيلي عالي جداً..
بس لما تحطه تحت ضغط شديد تاخد منه شغل كويس جداً
عندة CV محترم

لموظف الشيك (بيكهام ستايل)
يلبس سينيية
تسريحة الشعر التمام
دقيق و راكز وتقيل في شغلة بس Showy حبتين.. واجهة نضيفة للشركة و عايز ميشتغلش بإيده كتير.. يهمة أوي اسم الشركة اللي يشتغل فيها أكتر من الفلوس..
نص كلامة إنجليزي علي اساس انة جزء من الستايل بتاعه
عندة قلم ماركة وساعة ماركة و دايماً يطلع ميدالية مفاتيح عربيتة الجامدة علي أساس إنها جزء مهم من الشغل
الـPresentation skills بتاعتة عالية جداً.
كل البنات في الشركة بتحبه عشان هو جان في نفسه
بيعرف يسوق الدنيا بس بالشوكة و السكينة

الموظف الأصيل (توتي ستايل)
من ساعة ما اتخرج و هو شغال في الشركة و مش هيسيبها إلا على جثته. المسألة ان اسمة ارتبط بالمكان خلاص و كل العملاء و الإدارة متتخيلوش في مكان تاني.
الموظفين بيعاملوة علي إنة مدير حتى لو هو مش مدير، كفاية خبرته وكاريزمته و غالباً هيمسك الشركة في يوم من الأيام..
بيكون شاهد علي جزء كبير من تاريخ الشركة، وبيعرف يحل المشكلة لو حد قصده في مساعدة. دايماً حاد في تعاملاته عشان محدش ياخد عليه بس بيعامل الناس بحب

الموظف صاحب المزاج (مارادونا ستايل)
شاطر جداًً
ذكي جداً
محبوب جداً بس عيبه إنه صاحب مزاج و الأولوية إنه يظبط مزاجه عشان يعرف يفنن و يتكتك ..مش مستقر في شغلة و لا في الPerformance بتاعه. شكّاك جداً، بيتوتر بسرعة و ثباته الانفعالي قليل، بس هو من أحسن الناس اللي تقفل الـDeals حتي و لو حتي بطريقة غير شرعية.
هو من أحسن الناس اللي يعرف يثور ويعمل حوارات الشركة كلها تتكلم عليها.. مزاجه سايقه بقى.

 

اعمل تاج لفريق عملك و قولهم على شجصياتهم 😀


Facebook
LinkedIn
Twitter
Google+
http://blog.wuzzuf.net/%D8%A7%D9%84%D9%85%D9%88%D8%B8%D9%81%D9%8A%D9%86-%D8%B9%D8%A7%D9%85%D9%84%D9%8A%D9%86-%D8%B2%D9%8A-%D9%84%D8%B9%D9%8A%D8%A8%D8%A9-%D8%A7%D9%84%D9%83%D9%88%D8%B1%D8%A9/">
Pinterest
SHARE


Menu