10 حاجات لازم تختفي من سيرتك الذاتية

Facebook
LinkedIn
Twitter
Google+
http://blog.wuzzuf.net/%D8%AD%D8%A7%D8%AC%D8%A9-%D9%84%D8%A7%D8%B2%D9%85-%D8%AA%D8%AE%D8%AA%D9%81%D9%8A-%D9%85%D9%86-%D8%B3%D9%8A%D8%B1%D8%AA%D9%83-%D8%A7%D9%84%D8%B0%D8%A7%D8%AA%D9%8A%D8%A910/">
Pinterest
SHARE


الناس دايما بتهتم تعرف ايه الحاجات اللي تكتبها في السيرة الذاتية، لكن من ضمن الحاجات اللي الناس بتكتبها فيه معلومات ممكن تساهم في انها تقلل فرصهم في الشغل، عشان كده لازم برضه نعرف الحاجات اللي مينفعش تبقى موجودة في السيرة الذاتية.

وأهم الحاجات اللي لازم تختفي من سيرتك الذاتية:

هدف عام جدا

بعض الناس بتكتب في مقدمة السيرة الذاتية هدف عام بيعبر عن اللي عايزين يحققوه من خلال الشغل….بس ساعات لما بتقرأ الهدف ده مبتفهمش حاجة أو بتحس انه عام جدا لدرجة انه مالوش لازمة….المفروض السيرة الذاتية تبقى مختصرة على قد ما تقدر والاهداف غير الواضحة دي مساحة بتضيعها ممكن تكتب فيها حاجات أهم….عشان كده لو معندكش هدف محدد ومقتنع بيه فعلا يا ريت تحذف الجزء ده من سيرتك الذاتية.

معلومات أكتر من اللازم

السيرة الذاتية وظيفتها انها تقول المعلومات المهمة عنك اللي تساعدك في انك توصل لمقابلات العمل للوظايف…اكتب الحاجات المهمة ومش لازم تكتب كل الانشطة اللي اشتركت فيها في المدرسة والحاجات اللي مالهاش علاقة بالوظايف اللي انت مقدملها…و يا ريت سيرتك الذاتية ما تزيدش عن صفحة واحدة، حاول تختصر على قد ما تقدر، وخلي خبراتك في صورة نقاط والأهم يكون في الأول.

معلومات غير صحيحة عن خبراتك أو تعليمك

متحاولش تزود معلومات غير صحيحة عشان تحسن فرصك في القبول، لان فيه شركات كتير بتتأكد من المعلومات الموجودة في السيرة الذاتية، و لو اكتشفوها بعد ما تتقبل في الوظيفة هتخسر شغلك،…حاول تركز على الجوانب الايجابية الحقيقية في شغلك وخبراتك وتزودها في سيرتك الذاتية وهو ده اللي هيحسن فرصك في القبول في الوظايف.

وظايف مالهاش علاقة بالوظايف اللي انت بتقدملها

اكتب الوظايف اللي ليها علاقة بالمجالات اللي انت مهتم بيها بس… يعني مثلا لو اشتغلت جرسون في مطعم لفترة وده مجال بعيد تماما عن مجال البنوك اللي بتقدم فيها يُفضل انك تحذف الوظيفة دي من سيرتك الذاتية.

صورتك

لو هتشتغل موديل أو أي وظيفة الشكل فيها مهم كمعيار للاختيار يبقى الصورة ضرورية، لكن فيما عدا ذلك يُفضل ان السيرة الذاتية ميكونش فيها صورة عشان ما يبقاش في مجال لاصحاب العمل للتميز بناءً على الشكل… لكن خد بالك لو بتقدم لوظيفة خارج بلدك الصورة في السيرة الذاتية ممكن تكون مطلوبة.

المعلومات الشخصية

مش ضروري انك تكتب معلومات شخصية زي الحالة الاجتماعية والديانة واتجاهاتك السياسية، لان المعلومات دي ممكن – للأسف – تساهم في استبعاد بعض الشركات ليك…بلاش تديهم الفرصة بنفسك!

ايميل غير مهني

كتير مننا في مرحلة في حياتنا كان عندنا ايميل عنوانه اسم دلع او اسم لشخصية كرتونية، بس ايميل زي ده مينفعش يبقى موجود في السيرة الذاتية… لو لسه بتستخدم ايميلك القديم… ممكن تعمل ايميل جديد باسمك الموضوع مش هيكلفك فلوس أو وقت.

وسائل جذب الانتباه

استخدام وسائل مبالغ فيها لجذب الانتباه زي تنسيق الصفحة بشكل غريب أو استخدام حجم كبير للخط، واستخدام الوان او رسوم هيخلي السيرة الذاتية بتاعتك تتميز ..بس بشكل غير مرغوب فيه، لان اللي هيشوفها غالبا هيستبعدها لانه هيحس ان اسلوبك غير مهني.

الاخطاء الاملائية النحوية

الاخطاء الاملائية والنحوية في السيرة الذاتية دليل على الكسل وعدم الدقة وعدم الاهتمام بالتفاصيل وكلها صفات مش مرغوب فيها في أي مرشح لوظيفة…عشان كده لازم تراجع سيرتك الذاتية بدقة، وحتى لو مهاراتك في الكتابة والنحو ممتازة ممكن تخلي حد تاني يراجع سيرتك الذاتية عشان يكتشف اي اخطاء انت ممكن تكون مش واخد بالك منها ….اهم حاجة سيرتك الذاتية ما يبقاش فيها غلطة واحدة.

جملة “المراجع متوفرة عند الطلب”

بعض الناس بتكتب في آخر السيرة الذاتية جملة “المراجع متوفرة عند الطلب” أو “References Available Upon Request” لو صاحب الشغل مهتم انه يشوف أي مراجع هيطلبها منك…عشان كده الجملة دي مش ضرورية.


Facebook
LinkedIn
Twitter
Google+
http://blog.wuzzuf.net/%D8%AD%D8%A7%D8%AC%D8%A9-%D9%84%D8%A7%D8%B2%D9%85-%D8%AA%D8%AE%D8%AA%D9%81%D9%8A-%D9%85%D9%86-%D8%B3%D9%8A%D8%B1%D8%AA%D9%83-%D8%A7%D9%84%D8%B0%D8%A7%D8%AA%D9%8A%D8%A910/">
Pinterest
SHARE


Menu