• Home
  • Career Advice
  • ليه ماتستهونش بالأنشطة التطوعية قبل الشغل!

ليه ماتستهونش بالأنشطة التطوعية قبل الشغل!

Facebook
LinkedIn
Twitter
Google+
http://blog.wuzzuf.net/%D9%84%D9%8A%D9%87-%D9%85%D8%A7%D8%AA%D8%B3%D8%AA%D9%87%D9%88%D9%86%D8%B4-%D8%A8%D8%A7%D9%84%D8%A3%D9%86%D8%B4%D8%B7%D8%A9-%D8%A7%D9%84%D8%AA%D8%B7%D9%88%D8%B9%D9%8A%D8%A9-%D9%82%D8%A8%D9%84-%D8%A7/">
Pinterest
SHARE

عند شؤون الطلبة مستنى أصحابى اللى بيخلصوا ورقهم عشان الجيش و بما انى فاضى فماعنديش اى مانع ألبى طلب أى حد منهم عشان نروح مع بعض, تقريبا عشان ينكد عليا و يفكرنى ان عندى جيش :), و ده كان نفس وقت تقديم طلبة الثانوية العامة فى هندسة, و طبعا لم تخل القعدة من شوية ذكريات بعضها أليم و بعضها أكثر إيلاما و البعض حلو, على شوية حقد و غل لأن الكلية حصل فيها تعديلات كتير تسهل  عليهم أكتر بكتير مما كان متاح لنا,و تشوفهم تفتكر بسمة الأمل اللى كانت على وشك لما كنت قدهم, و اللى من غيرها ما كنتش قدرت تكمل للآخر.

كنا قاعدين بنفتكر الدكاترة اللى قابلناهم و الامتحانات و الجيش … الخ, لحد ما جالنا شاب صغير, باين انه لسه بيقدم, بيكلمنا بكل احترام و قلقان و هو بيتكلم ” السلام عليك, حضرتك اتخرجت مش كده ؟ تنصحنى أدخل قسم ايه ؟؟ ” –و تلاحظ إن الجمل كلها اتقالت مرة واحدة ورا بعض
فضلت متنح فيه شوية .. أصله فكرنى بنفسى من خمس سنين فاتوا, كنت مش عارف انا عايز ايه, منطوى جدا, و تعاملى مع الناس نادر, كنت معقد م الآخر :) و المشكلة الأكبر كانت فى إنى مش شايفها مشكلة أصلا أو كنت شايفها مع الوقت هتتحل..

رأيى إن المشاكل ده معظمها هو عدم الخبرة فى التعامل مع الناس فى الحياة عامة, و معظم اللى بنشوفهم بيكونوا قرايبنا أو ناس نعرفهم و معاهم المشاكل ده بتكون مختفية,
لكن بتظهر لما نحتك بالواقع بنفسنا ..

هاتعامل ازاى مع ناس ماعرفهومش ؟  لو كان زميلى فى الشغل, لو كان مديرى, لو كان عامل
لو حد طلب منى حاجة عمرى ما عملتها قبل كده هعملها إزاى ؟؟
لو فيه مشكلة فى الشغل هقولها لمين؟ و إزاى؟
لو فيه فكرة كويسة و عايز أعرضها لحد, هعرضها إزاى ؟؟

الكلام ده طبعا ممكن تتعلمه لما تشتغل, بس سؤال مهم, مين دلوقتى ممكن يبقى عنده صبر على ما تتعلم عشان تشتغل ؟! و لو فيه حد تانى عارف الكلام ده و أكتر, مين فيكو هيفضل صاحب الشغل إنه يشغله ؟!

و ده بعض أسباب وجود الأنشطة الطلابية فى الجامعات, مجموعة طلبة هدفهم مساعدة زمايلهم مش بس بتحضير الكورسات اللى تفيدهم, لكن النشاط نفسه و تنظيمه بيخللى اللى بيشتغل فيه بيتعلم كتير, لأنه شكل قريب جدا للى بيحصل فى الشغل, بفارق – و ده باعتبره ميزة – انه عمل تطوعى..

كمثال – قصة حياة نشاط طلابى  :

فى أوله كان مجموعة طلبة نفسهم يقدموا الكورسات – اللى الناس بتدفع فيها فلوس كتير فى مراكز التدريب – لزمايلهم ببلاش. عشان ده يحصل:
محتاجين ناس تتدرب على الكورسات ده عشان تقدر تشرحها,
و محتاجين يكلموا مراكز التدريب عشان تساعدهم,
و محتاجين يكلموا شركات متحمسة للموضوع عشان تساعدهم ماديا,
و محتاجين يكلموا إدارة الكلية عشان ياخدوا التصاريح,
و محتاجين ناس تكلم الطلبة فى الكلية عشان يعرفوهم بالنشاط و بالكورسات اللى بيعملها,
و محتاجين مواد و ورق و طباعة

و طبعا لازم يتعاملوا مع ناس هيشوفوهم لأول مرة, و هيكلموا شركات عشان يعرضوا عليهم الفكرة, و يطلبوا منهم المساعدة, و لو كان فيه مشكلة فى شغلهم هيتصرفوا إزاى, و لو حصلت مشكلة فجأة هيصرفوا إزاى, ده غير إنهم بيدرسوا هينظموا وقتهم إزاى …

كل موقف بيعدى عليك فى الأنشطة ده بيعلمك و بيديك خبرة, هتفيدك شخصيا, و هتفيدك فى شغلك..
و كل ده اللى بيقوم به الشباب بنفسهم, الفرق تقريبا الوحيد اللى بينهم و بين الشركات اللى بتؤدى نفس الخدمة, هى إنهم بيعملوها بشكل تطوعى  و مش هدفهم الربح المادى.

و ده عامة بقت نصيحتى لأى حد باشوفه جديد فى الكلية هى إنه يشارك فى الأنشطة ده لأنه هيتعلم, و هيفيد غيره, و هيعمل خير إن شاء الله ربنا يتقبله منه.


Facebook
LinkedIn
Twitter
Google+
http://blog.wuzzuf.net/%D9%84%D9%8A%D9%87-%D9%85%D8%A7%D8%AA%D8%B3%D8%AA%D9%87%D9%88%D9%86%D8%B4-%D8%A8%D8%A7%D9%84%D8%A3%D9%86%D8%B4%D8%B7%D8%A9-%D8%A7%D9%84%D8%AA%D8%B7%D9%88%D8%B9%D9%8A%D8%A9-%D9%82%D8%A8%D9%84-%D8%A7/">
Pinterest
SHARE


Menu